ఇండియా వ్యాక్సిన్‌కు ఫుల్ డిమాండ్.. అంచనాలకు మించి!

భారత్‌లో అభివృద్ధి చేసిన కొవిడ్ వ్యాక్సిన్లకు ప్రపంచవ్యాప్తంగా మంచి డిమాండ్ వస్తోంది. తమ దేశాలకు టీకా సరఫరా చేయాలని వివిధ దేశాలు కేంద్ర ప్రభుత్వాన్ని సంప్రదిస్తున్నాయి. కరోనా విలయంతో విలవిలలాడుతున్న బ్రెజిల్‌ మరో అడుగు ముందుకేసి వ్యాక్సిన్ కోసం భారత్ బయోటెక్‌తో ఒప్పందం చేసుకుంది. ఈ విషయాన్ని భారత్ బయోటెక్ మంగళవారం (జనవరి 12) వెల్లడించింది. బ్రెజిల్‌కు 12 మిలియన్ డోసుల వ్యాక్సిన్‌ను సరఫరా చేయడానికి భారత్ బయోటెక్ ఒప్పందం చేసుకున్నట్లు ఆ కంపెనీ వర్గాల ద్వారా తెలుస్తోంది.

బ్రెజిల్‌కు కొవాగ్జిన్‌ టీకాను సరఫరా చేసేందుకు అక్కడి మెడికల్‌ ఏజెన్సీ ‘ప్రెసిసా మెడికామెంటోస్‌’తో ఒప్పందం కుదుర్చుకున్నట్లు భారత్‌ బయోటెక్‌ సీఎండీ డాక్టర్‌ కృష్ణ ఎల్ల తెలిపారు. ప్రెసిసా ప్రతినిధులు జనవరి 7, 8 తేదీల్లో హైదరాబాద్‌లోని తమ కేంద్రాన్ని సందర్శించినట్లు ఆయన చెప్పారు. వ్యాక్సిన్ వివరాలు, సరఫరా ప్రక్రియపై చర్చించినట్లు వెల్లడించారు.

భారత్‌లో అభివృద్ధి చేసిన వ్యాక్సిన్లు బ్రెజిల్‌ ప్రజల ఆరోగ్య అవసరాలకు ఉపయోగపడుతుండటం సంతోషదాయకం అని కృష్ణ ఎల్ల పేర్కొన్నారు. కొవాగ్జిన్‌ టీకా పూర్తి సురక్షితమని తేలిందని ఆయన చెప్పారు. కరోనా వైరస్ నుంచి రోగనిరోధకత కల్పించడంలోనూ మంచి పనితీరు కల్పిస్తుందని రుజువైందని తెలిపారు.

భారత్‌ బయోటెక్‌ రూపొందించిన కొవిడ్ వ్యాక్సిన్ తమ అంచనాలను మించి ఉందని బ్రెజిల్‌ ఫార్మా సంస్థ డైరెక్టర్‌ ఎమాన్యూయేల్‌ మెడ్రాడెస్‌ అన్నారు. భారత్‌ బయోటెక్‌తో చేసుకున్న ఒప్పందం తమ దేశానికి ఎంతగానో ఉపయోగపడుందని వ్యాఖ్యానించారు. బ్రెజిల్‌ దేశానికి చెందిన ప్రైవేట్ సంస్థలు కూడా టీకా కోసం భారత్‌ను సంప్రదిస్తున్నాయి. బ్రెజిల్‌ ఔషధ నియంత్రణ సంస్థ ‘అన్విసా’తో అనుమతి తీసుకొని తమ దేశంలో కరోనా వ్యాక్సిన్ అందించనున్నాయి.

మరోవైపు.. భారత్‌ బయోటెక్‌ నుంచి 55 లక్షల డోసుల కొవాగ్జిన్‌‌ను తీసుకుంటున్నట్లు కేంద్ర ప్రభుత్వం తెలిపింది. వీటిలో 16.5 లక్షల డోసులను భారత్‌ బయోటెక్‌ ఉచితంగా అందిస్తున్నట్లు కేంద్ర ఆరోగ్య శాఖ తెలిపింది. మిగిలిన 38.5 లక్షల డోసుల్లో ప్రతి డోసుకు రూ.295 చొప్పున కొనుగోలు చేస్తున్నట్లు చెప్పింది. ఇదిలా ఉండగా.. కొవిషీల్డ్ టీకాను రూ.200లకే అందివ్వాలని కేంద్ర ప్రభుత్వం కోరింది.